அரசுப் பள்ளி மாணவர்களுக்கு மருத்துவ படிப்பில் 7.5% இட ஒதுக்கீட்டிற்கு ஆளுநர் ஒப்புதல்அளித்துள்ளார்! 

மருத்துவ படிப்பு அரசு பள்ளி மாணவர்களுக்கு எட்டாக் கனியாகவே இருப்பதாக பலரும் கருத்து தெரிவித்து வந்தனர். அதனால் அவர்களின் கனவை நினைவாக்கும் பொருட்டு தமிழக அரசு, 7.5% இட ஒதுக்கீடு மசோதாவை சட்டப்பேரவையில் நிறைவேற்றியது. இந்த மசோதா நிறைவேற்றப்பட்டு 45 நாட்களுக்கு மேல் ஆகியும் ஆளுநர் பன்வாரிலால் புரோகித் அதற்கு ஒப்புதல் அளிக்காமல் இருந்தார்.

இதனால் நடப்பாண்டு எம்.பி.பி.எஸ் மாணவர் சேர்க்கையில் உள் ஒதுக்கீடு அமல்படுத்தப்படுமா? என்ற கேள்வி வெகுவாக எழுந்த நிலையில், அவர் விரைந்து ஒப்புதல் அளிக்க வேண்டும் என பல தரப்பினர் கோரிக்கை விடுத்து வந்தனர். இதனிடையே, அரசு உள் ஒதுக்கீட்டை உறுதிப்படுத்தி அரசாணை வெளியிட்டது. இந்த நிலையில், 7.5% உள் ஒதுக்கீடு மசோதாவுக்கு ஆளுநர் ஒப்புதல் வழங்கியுள்ளார்.

சட்டப்பேரவை நிறைவேற்றப்பட்டு ஒன்றரை மாதம் ஆன இந்த சட்ட மசோதா குறித்து, சொலிசிட்டர் ஜெனரலின் கருத்தை கேட்டிறிந்து ஆளுநர் ஒப்புதல் அளித்துள்ளார். இதன் மூலமாக 303 அரசு பள்ளி மாணவர்களுக்கு மருத்துவ படிப்பில் சேர வாய்ப்பு கிடைக்கும் என தெரிவிக்கப்பட்டுள்ளது.