5 மாதங்களுக்கு மேலாகியும் இன்றும் கொரோனா குறையாத ஒரே நாடு இந்தியா - ராமதாஸ் 

கொரோனா தொற்று பரவத் தொடங்கி 5 மாதங்களுக்கு மேலாகியும் இன்றும் குறையத் தொடங்காத ஒரே நாடு இந்தியா தான் என்று பாமக நிறுவனர் ராமதாஸ் தெரிவித்துள்ளார். உலக அளவில் கொரோனா தொற்று எண்ணிக்கையில் 43,00,000 பாதிப்புகளுடன் இந்தியா இரண்டாமிடத்தில் உள்ளது.

அதே போல், பலி எண்ணிக்கையும் 73 ஆயிரத்தை தாண்டியது. இந்தியாவில் கடந்த 24 மணி நேரத்தில் புதிதாக 89,706 பேர் கொரோனாவால் பாதித்துள்ளனர். இதன் மூலம், மொத்த பாதிப்பு எண்ணிக்கை 43,70,128 ஆக உயர்ந்தது.

புதிதாக 1,115 பேர் இறந்துள்ளனர்.

இதனால், நாட்டின் மொத்த உயிரிழந்தோர் எண்ணிக்கை 73,890 ஆக அதிகரித்துள்ளது. இதுவரை 33,98,844 பேர் கொரோனாவில் இருந்து மீண்டுள்ளனர். இந்தியாவில் கொரோனா தொற்றால் பாதிக்கப்பட்ட 8,97,394 பேருக்கு மருத்துவமனையில் சிகிச்சை அளிக்கப்படுகிறது.



இந்த நிலையில் இந்தியாவில் கொரோனா பாதிப்பு குறித்து பாமக நிறுவனர் ராமதாஸ் வெளியிட்டுள்ள ட்விட்டர் பதிவில், 'கொரோனா தினசரி பாதிப்புகள் அமெரிக்காவில்  28,561 ஆகவும், பிரேசிலில் 17,330 ஆகவும் குறைந்து விட்டது.

ஆனால், இந்தியாவில் 89,852 ஆக அதிகரித்து விட்டது. உலக அளவில் கடந்த 24 மணி நேரத்தில் ஏற்பட்ட 2.47 லட்சம் தொற்றுகளில் மூன்றில் ஒரு பங்கு இந்தியாவில் ஏற்பட்டவை! கொரோனா தொற்று பரவத் தொடங்கி 5 மாதங்களுக்கு மேலாகியும் இன்றும் குறையத் தொடங்காத ஒரே நாடு இந்தியா தான்.

எனவே, தமிழ்நாடு உள்ளிட்ட இந்திய மக்கள் இதை கருத்தில் கொண்டு  மிகவும் எச்சரிக்கையுடன் நடந்து கொள்ள வேண்டும்!' எனத் தெரிவித்துள்ளார்.