கொரோனாவில் இருந்து மீண்டவர் எண்ணிக்கை 3 மடங்கு அதிகம் 

இந்தியாவில் கொரோனா தொற்றுக்கு சிகிச்சை பெறுவோரை விட அதில் இருந்து மீண்டவர் எண்ணிக்கை 3 மடங்கு அதிகம் ஆகும். இதைப்போல இறப்பு விகிதமும் 1.85 சதவீதமாக சரிந்து உள்ளது.

ஒருபுறம் மின்னல் வேகத்தில் கொரோனா பரவினாலும், மறுபுறம் அதில் இருந்து குணமடைவோர் எண்ணிக்கையும் அதிகரித்து வருகிறது. இது அரசுகளுக்கு மட்டுமின்றி, பொதுமக்களுக்கும் சற்று நிம்மதியை ஏற்படுத்தி உள்ளது.



இந்தியாவில் நேற்று காலை 8 மணி வரையிலான 24 மணி நேரத்தில் 57 ஆயிரத்து 469 பேர் குணமடைந்துள்ளனர். இதன் மூலம் நாடு முழுவதும் கொரோனாவில் இருந்து இதுவரை மீண்டவர்களின் எண்ணிக்கை 23 லட்சத்து38 ஆயிரத்து 35 ஆக உயர்ந்து உள்ளது.



நாட்டின் மொத்த கொரோனா பாதிப்பு எண்ணிக்கை 31 லட்சத்தை கடந்திருக்கும் நிலையில், மீண்டவர் எண்ணிக்கையும் 75.27 சதவீதமாக அதிகரித்து உள்ளது.



தற்போது 7 லட்சத்து 10 ஆயிரத்து 771 பேர் மட்டுமே சிகிச்சையில் உள்ளனர். இது மொத்த எண்ணிக்கையில் 22.88 சதவீதம் ஆகும். இதன் மூலம், கொரோனாவுக்கு சிகிச்சை பெறுவோரை விட குணமடைந்தவர் எண்ணிக்கை 3 மடங்குக்கு மேல் அதிகரித்து இருப்பது தெரியவந்துள்ளது.



இதைப்போல கொரோனா இறப்பு விகிதமும் 2 சதவீதத்துக்கும் கீழே சரிந்து, 1.85 சதவீதமாக உள்ளது. நேற்று காலை 8 மணி வரையிலான 24 மணி நேரத்தில் 836 பேர் இறந்தனர். இது முந்தைய 2 நாட்களை ஒப்பிடும்போதுகுறைவாகும்.