மருத்துவமனையில் கொரோனாவுக்கு சிகிச்சை பெற்ற வடமாநில சிறுவன் தப்பி ஓடியதால் பரபரப்பு  

காசிமேடு எஸ்.என்.செட்டி தெருவில் சிறுவர் சீர்திருத்தப் பள்ளி உள்ளது. பல்வேறு குற்றச்செயலில் ஈடுபட்ட 50க்கும் மேற்பட்ட சிறுவர்கள் இங்கு தங்க வைக்கப்பட்டுள்ளனர். கடந்த வாரம் இங்குள்ள சிறுவர்களுக்கு கொரோனா பரிசோதனை செய்யப்பட்டது. இதில் 35 பேருக்கு வைரஸ் தொற்று இருப்பது தெரிய வந்தது. இதையடுத்து அனைவரும் தண்டையார்பேட்டையில் உள்ள அரசு காலரா மருத்துவமனை மற்றும் அரசு புறநகர் மருத்துவமனைகளில் சேர்க்கப்பட்டு சிகிச்சை பெற்று வந்தனர்.இந்நிலையில், தண்டையார்பேட்டை அரசு காலரா மருத்துவமனையில் சிகிச்சை பெற்று வந்த வடமாநிலத்தை சேர்ந்த 17 வயது சிறுவன் நேற்று முன்தினம் நள்ளிரவு சிறப்பு வார்டு ஜன்னல் வழியாக ஏறி குதித்து தப்பி ஓடிவிட்டான். இதுபற்றி அறிந்த மருத்துவமனை ஊழியர்கள் பல இடங்களில் தேடியும் அந்த சிறுவனை கண்டுபிடிக்க முடியவில்லை.  சிறுவன் தப்பி ஓடியதால் பரபரப்பு ஏற்பட்டது. இதையடுத்து மருத்துவமனை நிர்வாகம் புதுவண்ணாரப்பேட்டை போலீசில் புகார் செய்தது. அதன்படி போலீசார் வழக்குப்பதிவு செய்து சிகிச்சையில் இருந்து தப்பிய வடமாநில சிறுவனை தேடி வருகின்றனர். இந்த சம்பவம் தண்டையார்பேட்டை பகுதியில் பரபரப்பை ஏற்படுத்தியது.