எல்.முருகனை நேரில் சந்தித்து வாழ்த்துக்கள் தெரிவித்த குஷ்பு! 

தமிழக சட்டமன்றத்திற்குள் நுழைய வேண்டுமென்ற பாஜகவின் கனவு 20 ஆண்டுகளுக்கு பிறகு நிறைவேறியது. இதற்கு முக்கிய காரணம் பாஜக மாநில தலைவராக இருந்த எல்.முருகன். அவரது தலைமையில் தான் இது சாத்தியமானது. தமிழக பாஜக தலைவராக இருந்த தமிழிசை தெலுங்கானா ஆளுநராக நியமிக்கப்பட்ட பிறகு, எல்.முருகன் தமிழக பாஜக தலைவராக நியமிக்கப்பட்டார்.

அவர் தலைமையில் பாஜக சிறப்பாக செயல்பட்டது. பல சினிமா பிரபலங்கள் பாஜகவில் இணைந்தனர். நடந்து முடிந்த சட்டமன்றத் தேர்தலில் தாராபுரம் தொகுதியில் போட்டியிட்ட அவர் குறைந்த வாக்கு வித்தியாசத்தில் தோல்வியைத் தழுவினார். எனினும், தமிழகத்தில் பாஜகவை காலூன்ற வைத்த எல்.முருகனுக்கு சிறப்பு அந்தஸ்து வழங்க பாஜக தலைமை திட்டமிட்டது. அதன்படி அவர், மீன்வளம் கால்நடை மற்றும் தகவல் ஒலிபரப்பு ஆகிய துறைகளின் மத்திய இணை அமைச்சராக நியமிக்கப்பட்டார். தமிழகத்தை சேர்ந்த ஒருவர் மத்திய இணை அமைச்சராக நியமிக்கப்பட்டதற்கு பலர் வாழ்த்துக்களை தெரிவித்து வருகின்றனர்.