சீனாவுடனான லடாக் எல்லை பிரச்னை இன்னும் தீரவில்லை என அமைச்சர் ராஜ்நாத் சிங் நாடாளுமன்றத்தில் தெரிவித்தார்! 

இந்திய – சீன எல்லையான லடாக்கில், சீன ராணுவம் அத்துமீறி நடத்திய தாக்குதலில் 20 ராணுவ வீரர்கள் வீர மரணம் அடைந்தனர். அந்த தாக்குதலின் போது சீன ராணுவத்தை இந்திய ராணுவம் விரட்டி அடித்த நிலையில், சீன ராணுவ அதிகாரி உட்பட 43 பேர் உயிரிழந்ததாக கூறப்படுகிறது. ஆனால் சீனா தரப்பில் இருந்து வீரர்களின் மரணம் குறித்து அதிகாரப்பூர்வ தகவல் ஏதும் வெளியாகவில்லை. இந்த சம்பவத்தில் இருந்தே லடாக்கில் பதற்றம் நிலவி வருகிறது.

இதனைத்தொடர்ந்து சீன ராணுவம் ஒப்பந்தத்தை மீறி மீண்டும் அத்துமீறியதால் இந்திய ராணுவத்துக்கு வலுசேர்க்கும் விதமாக 5 ரஃபேல் போர் விமானங்கள் விமானப்படையில் சேர்க்கப்பட்டன. இந்த நிலையில் சீனாவுடனான எல்லை பிரச்னை இன்னும் தீரவில்லை என பாதுகாப்புத்துறை அமைச்சர் ராஜ்நாத் சிங் நாடாளுமன்றத்தில் தெரிவித்துள்ளார். லடாக் எல்லை பிரச்னையால் இந்திய சீன உறவில் தாக்கம் ஏற்படும் என்றும் எல்லையில் அத்துமீறக்கூடாது என சீன அமைச்சரிடம் எச்சரிக்கை விடுதிருப்பதாகவும் எல்லை ஆக்கிரமிப்பு முயற்சிகளை இந்திய ராணுவம் முறியடிக்கும் என்றும் அவர் தெரிவித்தார்.

மேலும், நாட்டு மக்கள் ராணுவத்துக்கு பக்கபலமாக இருப்பதை பிரதமரின் லடாக் பயணம் தெரிவிப்பதாகவும் மலைப்பகுதியில் இருக்கும் ராணுவ வீரர்களுக்கு குளிர்காலத்தில் தேவையான சிறப்பு கருவிகள் வழங்கப்பட்டிருப்பதாகவும் அவர் கூறினார்.