கொரோனா மாறுபாடுகளுக்கு நட்சத்திர கூட்டங்களின் பெயர் - உலக சுகாதார அமைப்பு பரிசீலனை 

சீனாவின் வுகான் நகரில் முதன்முதலில் தோன்றிய கொரோனா வைரஸ், அதன்பின் படிப்படியாக மாறுபாடு அடைந்து தற்போது பல்வேறு வடிவங்களில் மக்களைத் தாக்கி வருகிறது.

இந்த மாறுபாடுகளுக்கு கிரேக்க எழுத்துக்களைக் கொண்டு பெயர் சூட்டப்பட்டு வருகிறது. அந்தவகையில் ஆல்பா, பீட்டா, காமா, டெல்டா, ஈட்டா, லோட்டா என பெயர்கள் சூட்டப்பட்டு வருகின்றன.

கிரேக்க எழுத்து வரிசையில் 24 எழுத்துக்கள் உள்ளன. ஆனால் கொரோனா தொடர்ந்து மாறுபாடு அடைந்து வருவதால், இந்த எழுத்துக்களுக்குப் பிறகும் பெயர்கள் தேவைப்படும் என தெரிகிறது.

அவ்வாறு தேவைப்பட்டால் நட்சத்திரக் கூட்டங்களின் பெயர் சூட்டுவதற்கு பரிசீலிப்பதாக உலக சுகாதார அமைப்பு கூறியுள்ளது.

அதேநேரம், கிரேக்க கடவுளர் அல்லது பெண் தெய்வங்களின் பெயரை சூட்டவும் யோசனை இருப்பதாக உலக சுகாதார அமைப்பின் கொரோனா தொழில்நுட்பக்குழு தலைவர் மரியா வான் கெர்கோவ் கூறியுள்ளார்.