பிள்ளைகளுக்கு மனஉறுதி, தோல்வியை தாங்க கூடிய சக்தியை சொல்லி கொடுங்கள் - மு.க.ஸ்டாலின்  

பிள்ளைகளின் எதிர்காலத்தை நினைத்து பயப்படுவது நியாயம் தான். ஆனால், அதே பிள்ளைகளுக்கு மன உறுதியையும், தோல்வியை தாங்கக்கூடிய சக்தியையும் சொல்லிக் கொடுங்கள் என்று திமுக தலைவரும், சட்டமன்ற எதிர்க்கட்சி தலைவருமான மு.க.ஸ்டாலின் பெற்றோர்களுக்கு அன்பான வேண்டுகோள் விடுத்துள்ளார்.

நாடு முழுவதும் நீட் தேர்வு நடைபெறுகிறது. 15 லட்சம் மாணவர்கள் நீட் தேர்வு எழுதுகின்றனர். தமிழகத்தில் நீட் தேர்வுக்கு தயாராகி வந்த மூன்று மாணவர்கள் ஜோதிஸ்ரீதுர்கா, ஆதித்யா, மோதிலால் ஆகியோர் ஒரேநாளில் அடுத்தடுத்து தற்கொலை செய்துகொண்ட சம்பவம் மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது.

தமிழகத்தில் நீட் தேர்வை ரத்து செய்ய வேண்டும் என்றும் அதே நேரத்தில் மாணவர்கள் தன்னம்பிக்கையோடு இருக்க வேண்டும் என்றும் அரசியல் தலைவர்கள் முதல் பொதுமக்கள் வரை அனைவரும் கருத்து தெரிவித்து வருகின்றனர். இந்நிலையில் திமுக தலைவரும்,

சட்டமன்ற எதிர்க்கட்சி தலைவருமான மு.க.ஸ்டாலின் உருக்கமான பேசிய வீடியோ நேற்று வெளியானது அதில்: மருத்துவர்கள் ஆக வேண்டும் என்று கனவோடு இருக்கும் மாணவ செல்வங்களுக்கும், அவர்களுடைய பெற்றோர்களுக்கும் என்னுடைய பணிவான வணக்கம்.



நீட் தேர்வுக்கு தயாராகும் மாணவர்கள் சிலர் தற்கொலை செய்து கொள்ளக்கூடிய செய்திகள் தொடர்ந்து வந்து கொண்டு இருக்கிறது.

அதுவும் மூன்று பேர் தற்கொலை செய்து கொண்டுள்ளனர். ஒவ்வொரு செய்தியை கேட்கும் போதும் நெஞ்சு படபடவெனவும், வேதனையாகவும் இருக்கிறது. அவர்கள் குடும்பத்தை நினைத்தால் பதபதப்பா இருக்கு, மாணவ செல்வங்களே இனியாரும் தற்ெகாலை முடிவை எடுக்காதீர்கள்.

பெற்றோர்களுக்கு என்னுடைய அன்பான வேண்டுகோள் பிள்ளைகளின் எதிர்காலத்தை பற்றி நீங்கள் கவலைப்படுவது நியாயம் தான் அதற்கு பிள்ளைகளுக்கு மனஉறுதியை முதலில் சொல்லிக் கொடுங்கள், அதே நேரத்தில் தோல்வியை எப்படி தாங்கிக் கொள்வது என்று சொல்லி கொடுங்கள்.

உங்களில் ஒருவனா? உங்கள் வீட்டில் ஒருத்தனா? உங்களையெல்லாம் உரிமையோடு கேட்கிறேன். தேர்வு முடிவுகள் எப்படி இருந்தாலும் முதலில் உங்கள் பிள்ளைகளுக்கு தைரியத்தையும், தன்னம்பிக்கையும் கொடுங்கள் பிளீஸ் என்று திமுக தலைவரும், சட்டமன்ற எதிர்க்கட்சி தலைவருமான மு.க.ஸ்டாலின் உருக்கமாக பேசிய வீடியோ நேற்று சமூக வலைதளங்களில் வேகமாக பரவியது.