திமுக தலைமை செயற்குழு உறுப்பினராக 2 பேர் தேர்வு: மு.க.ஸ்டாலின் அறிவிப்பு! 

சென்னை மேற்கு மாவட்ட திமுக தலைமை செயற்குழு உறுப்பினராக 2 பேர் தேர்வு செய்யப்பட்டுள்ளதாக மு.க.ஸ்டாலின் அறிவித்துள்ளார். இதுகுறித்து திமுக தலைவர் மு.க.ஸ்டாலின் வெளியிட்ட அறிவிப்பு: திமுகவின் 14வது பொதுத் தேர்தலில் சென்னை மேற்கு மாவட்ட தேர்தலில் திமுக தலைமை செயற்குழு உறுப்பினராக தேர்ந்தெடுக்கப்பட்ட ஏ.கே.ஜெகதீசன் மறைவெய்தியதாலும், கு.க.செல்வம் மீது நடவடிக்கை மேற்கொள்ளப்பட்டதாலும், இவர்கள்  வகித்து வந்த இடங்கள் நிரப்பப்பட வேண்டியிருந்தது.



அதன்படி, சென்னை மேற்கு மாவட்ட தலைமை செயற்குழு உறுப்பினர்கள் பொறுப்புகளுக்கான தேர்தல் நடைபெற உள்ளதையொட்டி, இப்பொறுப்புக்கு போட்டியிடுவோர் அதற்கென உள்ள படிவத்தில் முறைப்படி பூர்த்தி செய்து ஆகஸ்ட் 29ம் தேதி (நேற்று முன்தினம்), ரூ.25000 வீதம் தலைமைக் கழகத்தில் அளித்து ரசீது பெற்றுக்கொள்ள வேண்டும்” என தலைமை கழகம் சார்பில் அறிவிக்கப்பட்டது. இந்த பொறுப்புகளுக்கு எம்.கே.மோகன், வி.என்.ராஜன் ஆகிய இருவர் மட்டுமே  வேட்புமனு தாக்கல் செய்திருந்தனர். இதனால் அவர்களது மனு ஏற்கப்பட்டு சென்னை மேற்கு மாவட்ட தலைமை செயற்குழு உறுப்பினர்களாக எம்.கே.மோகன் எம்எல்ஏ மற்றும் வி.என்.ராஜன் ஆகியோர் தேர்ந்தெடுக்கப்பட்டதாக அறிவிக்கப்படுகிறது. இவ்வாறு அறிவிப்பில் கூறப்பட்டுள்ளது.