யூடியூப் பார்த்து பிரசவம் செய்த கணவர்... பரிதாபமாக உயிரிழந்த மனைவி...! 

கிருஷ்ணகிரி மாவட்டம் புளியம்பட்டியைச் சேர்ந்த லோகநாயகிக்கும், தருமபுரி மாவட்டம் அனுமந்தபுரம் கிராமத்தைச் சேர்ந்த மாதேஷுக்கும் கடந்த 2021ல் திருமணம் நடைபெற்றது. லோகநாயகி கர்ப்பமான நிலையில், அவருக்கு உரிய மருத்துவ பரிசோதனைகளை செய்யாமல் மாதேஷ் தவிர்த்துள்ளார். தடுப்பூசிகள் கூட போடாமல் இருந்துள்ளனர்.

இந்நிலையில், நேற்று அதிகாலை லோகநாயகிக்கு பிரசவ வலி ஏற்பட்டுள்ளது. குழந்தையை இயற்கை முறையில் பெற்றெடுக்க விரும்பிய மாதேஷ், அதற்காக யூடியூப் பார்த்து வீட்டிலேயே அதற்கான ஏற்பாடுகளை செய்துள்ளார். நலமுடன் குழந்தை பிறந்த நிலையில், நஞ்சுக்கொடி வெளியேறாததால் லோகநாயகி சுயநினைவை இழந்துள்ளார்.

குள்ளனூர் பகுதியில் உள்ள தனியார் மருத்துவமனைக்கு கொண்டுசென்று சோதித்த போது, அவர் ஏற்கனவே இறந்துவிட்டதாக மருத்துவர்கள் கூறியுள்ளனர். தகவலறிந்து வந்த

சுகாதாரத்துறையினர் மற்றும் காவல்துறையினர் உடலைக் கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இந்த சம்பவம் குறித்து வழக்குப்பதிவு செய்த போலீசார் தீவிர விசாரணை மேற்கொண்டு வருகின்றனர்.