பைக் ட்ரிப்பை முடித்துக் கொண்டு சென்னை திரும்பினார் அஜித்..! 

அஜித் நடிப்பில் கடந்த பொங்கல் பண்டிகையை முன்னிட்டு வெளியான படம் துணிவு. விஜய் நடிப்பில் வாரிசு படமும் வெளியான நிலையில் துணிவு ரசிகர்களிடையே பெறும் வரவேற்பை பெற்றது. துணிவு படத்திற்கு பிறகு அஜித்தின் 62 ஆவது படத்தை யார் இயக்குவார் என்ற எதிர்பார்ப்பு நிலவி வந்த நிலையில் மகிழ்திருமேனி அந்த திரைப்படத்தை இயக்குவார் என அதிகாரப்பூர்வ அறிவிப்பு வெளியானது. மேலும் விடாமுயற்சி என பெயர் வைக்கப்பட்டிருக்கும் அஜித்தின் 62வது படத்திற்கான படப்பிடிப்பு இன்னும் தொடங்கவில்லை.

இந்த நிலையில் டென்மார்க் நார்வே பகுதிகளில் பைக் சுற்றுப்பயணம் மேற்கொண்ட பின்பு நடிகர் அஜித் நார்வேயில் இருந்து விமான மூலம் துபாய் வழியாக சென்னை பன்னாட்டு விமான நிலையம் வந்தடைந்தார். சென்னை பன்னாட்டு விமான நிலையத்தில் வெளியே காத்திருந்த அவரது ரசிகர்கள் நடிகர் அஜித்தை கண்டவுடன் அவரை சுற்றி வளைத்து அவருடன் செல்பி எடுப்பதும் புகைப்படம் எடுத்துக் கொண்டனர்.

மேலும் சென்னை விமான நிலையத்தில் இருந்து தனது கார் மூலம் நீலாங்கரையில் உள்ள தனது இல்லத்திற்கு புறப்பட்டு சென்றதும் குறிப்பிடத்தக்கது. கார் வரை சென்ற அவரது ரசிகர்கள் அவருடன் செல்பி எடுப்பதற்கு ஆர்வம் காட்டியதால் சற்று பரபரப்பு ஏற்பட்டது. அஜித் சென்னை திரும்பியதை அடுத்து, விடாமுயற்சி ஷூட்டிங் விரைவில் தொடங்கும் என எதிர்பார்க்கப்படுகிறது.